_1704867435.jpeg)
धरान: धरान उपमहानगरपालिकाले ठेक्का लगाएको सर्दु खोला पनि लफडा भएको छ ।
धरान १७ का डाँडा घोपाबासीहरुले चुरे क्षेत्रमा जथाभावी उत्खनन् गरेको भन्दै विरोध जनाएका छन् । उनीहरुले आज बिहान सर्दु खोलामा पुगेर उत्खनन्मा रोक लगाएका हुन् । चुरे क्षेत्र भनेर विगतमा उपमहानगरपालिकाले नै स्थानीयलाई ढुंगा, गिट्टी निकाल्न रोक लगाउने गरेको र स्थानीयबासीले संरक्षण गरिरहेको सामुदायिक वन क्षेत्रमा नै क्षति पुग्ने गरि अहिले ठेक्का लगाएको भन्दै डाँडाघोपाबासीले उत्खनन्मा रोक लगाएका हुन् ।
डाँडाघोपा नमुना मार्ग टोल विकास संस्थाका संयोजक लिलाबहादुर बुढाथोकीले चुरे भावर क्षेत्रमा ढुंगा, बालुवा, मिसगिट्टी निकाल्न प्रतिबन्ध रहे पनि जनप्रतिनिधिले नै ठेक्का लगाएर उत्खनन् गर्न आदेश दिएको भन्दै आक्रोश पोखे । गत बर्ष पनि खानेपानीको पाइपलाइन क्षति पुगेको भन्दै उनले मर्मत गर्नुपर्ने, पानी ट्यांकी मर्मत गर्नलगायतको सामाजिक कार्यमा बजेट विनियोजन हुनुपर्ने उनले बताए । नम्बरी र ऐलनी जग्गाको साँधसिमाना, बाटोको सिमाना प्रष्ट छुट्याएर मात्र उत्खनन् गर्न दिइने उनले बताए ।
यस्तै, डाँडाघोपा नमुना सामुदायिक वनका अध्यक्ष सिवन कुमार राईले जिल्ला वन कार्यालयसँग समन्वय पनि नगरि उत्खनन् भइरहेको पाएको बताए । उत्खनन् गर्दा धेरै क्षति हुने उनको भनाई छ । ठेकेदार कम्पनी पाथीभारा निर्माण सेवाका प्रोपाइटर अर्जुन भण्डारीले भने नगरपालिकाले ठेक्का लगाएको र प्रक्रिया अनुसार आफुले ठेक्का पाएपछि उत्खनन् थालेको बताए । नगरपालिकाले दिएको विधि, प्रक्रिया अनुसार नै उत्खनन् भइरहेको उनको दाबी छ ।
आज दिउँसो २ बजे खोला उत्खनन् विवादबारे उपमहानगरपालिकाले छलफलमा बोलाएको डाँडाघोपा टोल विकास संस्थाका अध्यक्ष बुढाथोकीले जानकारी दिए । हिजो पनि धरानको वडा नं ५ का वडाअध्यक्ष सन्तोष लिम्बुको नेतृत्वमा सेउती खोलामा भइरहेको उत्खनन् कार्यलाई रोकेका थिए । विभिन्न ७ बुँदाको निर्णय कार्यान्वनय नभएको भन्दै अध्यक्ष लिम्बुले उत्खनन् रोकेका थिए । अहिले भने प्रहरी परिचालन गरेर उत्खनन् भइरहेको छ । डिभिजन वन कार्यालय सुनसरीले पनि स्थानीय तहले वन क्षेत्रको आइईई गर्न र ठेक्का लगाउन नपाउने भन्दै रोक्न निर्देशन दिएपनि जर्बजस्ती उत्खनन् भइरहेको छ ।
_1711524552_1711967437.jpg)
