_1704867435.jpeg)
धरान: नेकपा एमालेबाट निवार्चित वडाअध्यक्ष र कार्यपालिका सदस्यहरुले घाटा बजेटप्रति असहमति जनाउदै पत्र बुझाएर बाहिरिएपछि कार्यपालिका बैठक अघि बढ्न सकेन ।
पाँच बुँदा रहेको पत्र कार्यपालिका सदस्य तथा एमाले दलका सचेतकको भुमिकामा रहेका अनुप देवानले वाचन गरेका थिए भने दलकी उपनेतासमेत रहेकी कार्यपालिका सदस्य सावित्री परियारले मेयर हर्कराज राईलाई बुझाएकी थिइन् । उनले पत्र बुझाएपछि मेयर राईले जवाफमा कुरा राखेपछि एमालेबाट निवार्चित वडाअध्यक्ष र कार्यपालिका सदस्यहरु बैठक हलबाट बाहिरिएका थिए ।
धरानको कार्यपालिका र नगरसभामा नेकपा एमालेको बहुमत छ । धरानमा १० वडाअध्यक्ष र ८ कार्यपालिका सदस्यसहित एमालेको बहुमत छ । चालु आर्थिक बर्षको बजेट ल्याउन नसकेर धरान आलोचित बनिरहेको छ । दुई दिनको अन्तरालमा आज (शुक्रबार) बसेको कार्यपालिका बैठकमा पनि एमालेका जनप्रतिनिधिहरुले स्रोत अनुमान तथा बजेट सिलिङ समितिले तोकेको २ अर्ब २० करोड बजेटमा असहमति जनाएको छ । यो समितिमा रहेका एमालेका नरेश इवारम र सावित्री परियारले उक्त निर्णयमा हस्ताक्षर गरेका थिएनन् । अन्य ४ जना सदस्यहरुले भने निर्णयमा हस्ताक्षर गरेका थिए ।
एमालेबाट निवाचित बहुमत वडाअध्यक्ष र कार्यपालिका सदस्यहरुले बैठक छोडेपछि केहीबेर बैठक अघि बढेको थियो । बैठकले बजेटको सिलिङ, कर्मचारीको तहवृद्धि, नीति तथा कार्यक्रमलाई अनुमोदन गर्न मेयर साम्पाङले आग्रह गरेपछि उपस्थित वडाअध्यक्षहरुले तालि बजाएका थिए । तर, मेयर, उपमेयर, कांग्रेस, एमाले र राप्रपाबाट निवार्चित वडाध्यक्षहरु भएपनि बैठकमा बहुमत पुग्न नसकेपछि मेयर साम्पाङले बैठक स्थगित गरेका थिए ।
कर वृद्धि नगर्न, मेयर उपमेयर कोषसमेत खारेज गर्न माग
एमालेले कार्यपालिका बैठकमा बुझाएको ५ बुँदे पत्रमा यो आर्थिक बर्षमा कुनै पनि शिर्षकमा कर वृद्धि गर्न नहुने बताएको छ । घाटा बजेटलाई पुरा गर्ने नाममा नगरबासीलाई करको भार थप्ने गरि ल्याइएको प्रस्ताव अस्विकार गर्ने एमालेबाट निवार्चित कार्यपालिका सदस्य तथा सचेतक अनुप देवानले बताए ।
यस्तै, मेयर कोष, उपमेयर कोष, मेयर भिजन कोष, उपमेयर भिजन कोष, कार्यपालिका सदस्यको कोष जस्ता अवण्डा कोषहरु खारेज गर्नुपर्ने पनि एमालेका जनप्रतिनिधिहरुको माग छ । उनीहरुले करलाई कुनै व्यक्ति वा पद बिशेषले आफुखुशी नभै वडा वा नगरको योजना मार्फत खर्च गरिनुपर्ने धारणा राख्दै ती कोषहरुलाई खारेज गर्न पनि माग गरेका छन् ।
यसैगरि नगरको यथार्थ आम्दानीलाई आधार मानेर सोही अनुसारको बजेट सिमा निर्धारण गर्नुपर्ने, नगरसभाबाट पारित भई रातो किताबमा प्रकाशित योजनाहरु नगर प्रमुखले आफ्नो तोक विना कार्यान्वयन गर्न नपाउने सामन्ती व्यवयहार देखाएकोमा पनि आपत्ति जनाउदै नगरसभाबाट पारित योजनाहरुमा आइन्दा हस्तक्षेप नगरी कार्यान्वयनमा लैजान नगरप्रमुखले लिखित प्रतिवद्धता कार्यपालिकामा गर्नुपर्ने पनि माग एमालेका जनप्रतिनिधिहरुले गरेका छन् ।
साथै, घाटा बजेट पुरा गर्ने नाममा उठ्नै नसक्ने राजश्वको प्रक्षेपण गरेर जनप्रतिनिधि र जनतालाई भ्रमित पार्न नहुने पनि कार्यपालिकामा मेयर हर्कराज राई (साम्पाङ)लाई बुझाएको पत्रमा उल्लेख छ । आज बुझाएको पत्रमा भने १६ जनाले मात्र हस्ताक्षर गरेका छन् । वडा नं १५ का अध्यक्ष नरेश इवारम र कार्यपालिका सदस्य देवीमाया विश्वकर्मा अनुपस्थिति थिए । वडाअध्यक्ष इवारम पार्टी नेतृत्वप्रति असन्तुष्टी जनाउदै संसदीय नेताबाट पनि राजिनामा दिएर कार्यपालिका बैठकमा पनि आएका छैनन् । कार्यपालिका सदस्य विश्वकर्मा भने वैदेशिक रोजगारीमा विदेश गइसकेकी छिन् ।
भिडियो:
भिडियो:
