धरान: धरान उपमहानगरपालिका नगर कार्यपालिकाका प्रवक्ता एवं वडा नं १७ का अध्यक्ष सुर्यबहादुर भट्टराई (मनोज)ले बजेट सम्बन्धी समस्याको हल छलफल र संवादबाट गर्न जोडदिएका छन् ।

नेकपा एमालेका वडाअध्यक्ष र कार्यपालिका सदस्यहरुले आज (शुक्रबार) कार्यपालिका बैठक छोडेर हिडेपछि आफ्ना कुरा राख्दै अध्यक्ष भट्टराईले यस्तो बताएका हुन् । उनले धरानका जनता र विश्वभरका नेपाली भाषीहरुले हेरिरहेकोले सबै पक्ष जिम्मेवार हुनुपर्ने बताए । 

‘हामी जिम्मेवार भएर जानुपर्छ, धरानको विकास र प्रगति, उन्नतिको लागि जनताले जिताएर पठाएको हो । हाम्रो दृष्टिकोण, बाटो फरक हुनसक्छ, तर उद्देश्य धरानको विकास र प्रगति नै हो,’ अध्यक्ष भट्टराईले भने,‘त्यसको लागि जिम्मेवार हुन जरुरी छ, हरेक समस्याको समाधान छलफलबाट गर्न सकिन्छ । संवाद र वार्ताबाट भागेर हल हुदैन ।’

मेयर र उपमेयर कोष आफु हुँदा ठिक, अरु हुँदा बेठिक !

वडाअध्यक्ष भट्टराईले मेयर र उपमेयर कोष दुवै एमालेले आफु हँुदा ठिक र अरु नेतृत्वमा हुँदा बेठिक भन्ने दोधारे प्रवृत्ति देखाएको भन्दै आलोचना पनि गरे । मेयर कोष स्वर्गीय मेयर तारा सुब्बाको पालामा २०७४ सालबाटै शुरु भएको र उपमेयर कोष २०७६ को उपनिर्वाचनमा तिलक राईले जितेपछि उपमेयर मञ्जु भण्डारीलाई आर्थिक अधिकार दिलाउन शुरुवात भएको अध्यक्ष भट्टराईले बताए। 

‘मेयर कोष ७४ सालबाट निरन्तर चलेको छ, उपनिर्वाचनमा तिलक राईले मेयरमा जितेपछि उपमेयर मञ्जु भण्डारीलाई आर्थिक अधिकार दिन ७६ सालमा उपमेयर कोष सुनिश्चित गरेको हो । त्यो बेला एमाले र माओवादी मिलेर नेकपा भएको थियो, र म नेकपामा भएको हिसाबले उपमेयर कोष हुनुपर्छ भन्ने मै हो । आज फेरि त्यो हुदैन कसरी भन्न सकिन्छ ?’ उनले भने,‘पोहोर मेयर भिजन र उपमेयर भिजन हामीले पास गरेकै हो, आज फेरि किन हुदैन ? मौषमी कुरा नगरौं, मेरो पार्टीले जित्दा हुन्छ, फलाना पार्टीले जित्दा हुदैन भन्ने दोहोरो कुरा नगरौं ।’ 

उनले स्रोत अनुमान तथा सिलिङ समितिमा केही नमिलेको भए सदस्यहरुले बैठकको माग गरेर छलफल गर्न तयार रहेको पनि बताए । ‘तर १७ पटक बसेर सकेको कुरामा फेरि नयाँ ढंगले जादा वडाअध्यक्षहरुले सिलिंग पाएर बनाइसक्नुभयो, कति टोलमा बजेट परेको छ, भनिसक्नुभयो होला, फेरि पर्ने हो कि होइन, छलफल गरौं,’ उनले भने,‘गुमराहमा राखियो भन्नुहुन्छ । तर, सिलिङ समितिमा भएका उहाँहरुको प्रतिनिधिले बैठकको कुरा आफ्ना पार्टीका वडाअध्यक्ष र कार्यपालिका सदस्यहरुलाई भन्नुपर्ने हो । यति बिषयमा छलफल भयो, यो बिषयमा असहमति छ भनेर । समस्या उहाँहरुको पार्टीभित्र नै छ ।’

भिडियो: