_1704867435.jpeg)
धरान: चौथो यु १८ धरान मेघा रेवाहाङ मेमोरियल अन्तरविद्यालय बास्केटवल प्रतियोगितामा १९ टिम सहभागी हुने भएको छ ।
प्रतियोगिताका आयोजकले आइतबार पत्रकार सम्मेलन गर्दै धरान, इटहरी, विराटनगर र झापाका विद्यालयहरु सहभागी हुने जानकारी दिएको हो । प्रतियोगिता धरान १२ स्थित धरान मेघा हिमालयन कलेजको बास्केटवल कोर्टमा हुनेछ ।
प्रतियोगितामा हिमशिखर बोर्डिङ स्कुल,पुर्वाञ्चल स्कुल, सुस्मा कलेज, सुकुना कलेज, लोटस स्कुल, नास्ट कलेज, सियोन स्कुल, युनएन नवोदय स्कुल, डिपोट स्कुल सहभागी हुने संघका अध्यक्ष नारायण सुवेदीले जानकारी दिए ।
यस्तै, धरान आदर्श स्कुल, धरान मेघा कलेज ए, धरान मेघा कलेज बि, माउण्ट हार्मोन, आइडियल स्कुल, देउराली चिल्ड्रेन, सुनाखरी एकेडेमी, होलिल्याण्ड इन्टरनेशन स्कुल, कार्मेल स्कुल र विद्या भुषण स्कुल सहभागी हुने पनि उनले बताए ।
प्रतियोगिताको विजेता टिमले नगद ३० हजारसँगै ट्रफी, मेडल र प्रमाणपत्र हात पार्नेछ भने उपविजेता टिमले नगद १५ हजार, ट्रफी, मेडल र प्रमाणपत्र हात पार्नेछ । यस्तै, मोष्ट भ्यालुएवल पुरस्कार, उदयीमान खेलाडीलाई नगद, ट्रफी र प्रमाण पत्र दिइने पनि उनले बताए । फाइनल खेल अघि थ्री पोइन्ट स्पर्धा पनि हुने अध्यक्ष सुवेदीले बताए ।
प्रतियोगिता माघ ६ गते उद्घाटन हुनेछ भने समापन माघ ११ गते हुनेछ । उद्घाटन समारोह धरानका उपप्रमुख अइन्द्रबिक्रम बेघाको प्रमुख आतिथ्यमा हुनेछ भने समापन समारोह कोशी प्रदेशका आन्तरिक मामिला तथा योजना मन्त्री विदुरकुमार लिङ्थेप प्रमुख अतिथि रहने पनि आयोजकले जनाएको छ ।
यो प्रतियोगिता १६ बर्षको उमेरमा असामयिक निधन भएका धरान १८ निवासी बास्केटवल खेलाडी रेवाहाङ रुन्छेन्बुङको स्मृतिमा विगत ३ बर्षदेखि आयोजना हुदै आएको छ । प्रतियोगिता आयोजना गर्न रेवाहाङ राई स्मृति प्रतिष्ठान, सुनसरी बास्केटवल संघ, धरान बास्केटवल संघ र धरान मेघा कलेजबीच सम्झौता एवं सहकार्य भइरहेको छ ।
स्वर्गीय रेवाहाङका बुबा रेवतीरमण राईले प्रतिभाशाली खेलाडीहरु उत्पादन गर्ने लक्ष्यसहित प्रतियोगिता शुरुवात भएको बताए । अक्षयकोष स्थापना गरेपनि प्रतियोगितालाई निरन्तरता दिन स्थानीय, प्रदेश सरकार एवं विभिन्न सामाजिक संघसंस्थाहरुले पनि सहयोग गर्नुपर्ने उनले बताए । आयोजक कलेजका प्रिन्सिपल भास्कर पौडेलले भविष्यमा अझ व्यवस्थितरुपमा प्रतियोगिता गर्ने प्रतिवद्धता जनाएका थिए ।
