_1704867435.jpeg)
धरान : वडा प्रहरी कार्यालय धरानको प्रमुखको जिम्मेवारी सम्हालेका वरिष्ठ प्रहरी नायव निरीक्षक राधाकृष्ण दाहालले लागुऔषध सेवन, ओसारपसार र बेचबिखन मुक्त धरान सहर बनाउन काम गर्ने बताएका छन् ।
नेपाल यातायात स्वतन्त्र मजदुर संगठन धरानले आईतबार स्वागत कार्यक्रममा दाहालले यस्तो बताएका हुन् । भानुचोकलाई व्यवस्थित गर्न सबैको साथ, समन्वय र सहयोग लिएर काम गर्ने पनि उनले बताए । यसअघि झापा जिल्ला स्थित इलाका प्रहरी कार्यालय सुरुङ्गाको कमाण्ड सम्हालीसकेका दहालले ठुलो परिमाणमा लागु औषध नियन्त्रणमा सफलता प्राप्त गरेका थिए ।
दाहाललाई स्वागत गर्दै कार्यक्रमका प्रमुख अतिथि संगठनका केन्द्रीय अध्यक्ष भीमज्वाला राईले धरानको बसपार्कमा हुने अवाञ्छित गतिविधि नियन्त्रण, सडक बालबालिकाहरुको व्यवस्थापन, लागु औषध सेवन, ओसारपसार र बेचबिखन नियन्त्रण र झैझगडा, तथा गुण्डागर्दी नियन्त्रण वडा प्रहरी कार्यालयको चुनौति रहेको बताए । राईले भने यति काम व्यवस्थित गर्न सकेमा धराने जनताले राहत महसुस गर्ने सुझाए ।
राईले बसपार्कमा काम गर्ने श्रमिकहरुलाई यात्रुमैत्री बनाउँदै यात्रु तानातान अन्त्य गर्न, सडक सुरक्षा बारे सचेतना अभियान सञ्चालनमा प्रहरीसंग सहकार्य गरिने बताए । यात्रुहरुको सुरक्षित यात्राको वातावरण बनाउन वडा प्रहरी कार्यालयलाई संगठन र यातायात मजदुरहरुको तर्फबाट साथ रहने राईले प्रतिवद्धता जनाएका थिए ।
दाहाललाई स्वागत गर्न विभिन्न क्षेत्रका श्रमिकहरु सहित मजदुर राजनीतिबाट उदाएर हाल धरान ८ नम्बर वडा अध्यक्ष धनबहादुर राई, मजदुर पृष्ठभूमिकै नेता धरान १५ नम्बर वडा सदस्य रंगलाल गिरी, नेकपा ९एमाले० सुनसरी सदस्य नारायण सुवेदी लगायतकाहरु सहभागी थिए ।
नेपाल यातायात स्वतन्त्र मजदुर संगठनका केन्द्रीय सदस्य लक्ष्मी बानियाँले सञ्चालन गरेको कार्यक्रमको अध्यक्षता संगठन धरान अध्यक्ष किरण थापाले गरेका थिए ।
