_1704867435.jpeg)
धरान: कोरोना भाइरस(कोभिड १९) संक्रमण रोकथाम गर्न पुर्वतयारी अवस्थामा रहेको वीपी कोइराला स्वास्थ्य विज्ञान प्रतिष्ठान धरानले आफ्ना सबै स्वास्थ्यकर्मीहरुलाई विदामा बस्न रोक लगाएको छ ।
नेपालमा अहिलेसम्म कोरोनाको संक्रमण नदेखिए पनि विश्वभर नै संक्रमण फैलिएर संकट निम्त्याइरहेकोले पुर्वतयारी अवस्थामा रहनको लागि प्रतिष्ठानले कार्यरत चिकित्सक तथा स्वास्थ्यकर्मीहरुलाई विदामा बस्न रोक लगाएको हो । प्रतिष्ठानका अस्पताल निर्देशक एवं कोरोना रोकथाम तथा उपचारको लागि गठित र्यापिड रेस्पोन्स टिमका संयोजक प्रा.डा.गौरीशंकर साहले काजकिरियामा बसेको अवस्थाबाहेक अन्य सबै अवस्थामा विदामा बस्न रोकिएको बताए । ‘अहिलेको अवस्था हेरेर कसैलाई पनि विदामा बस्न दिइएको छैन । कोही काजक्रियामा बस्नुपरेको भएमात्र विदा मिल्छ,’निर्देशक डा.साहले भने,‘हामी सजग भएर पुर्वतयारीमा नै छौं, भागेका छैनौं ।’
थ्रोट स्वाब परीक्षणको ल्याब वीपीमै हुने
थ्रोट स्वाब परीक्षण गर्नको लागि अहिलेसम्म टेकु अस्पतालमा पठाउनु पर्छ । थ्रोट स्वाबको परीक्षण कोरोना आशंका गरिएका व्यक्तिलाई कोरोना भए नभएको पुष्टि गर्न लिइएको नमुनाको जाँच हो ।
अहिलेसम्म आशंका गरिएका व्यक्तिको थ्रोट स्वाब लिएर टेकुमा पठाउनुपर्दा रिपोर्ट आउन समय लाग्ने गथ्र्यो । अब भने उक्त परीक्षणको लागि वीपीमा नै ल्याब स्थापना हुनेछ । प्रतिष्ठानका अस्पताल निर्देशक डा.गौरीशंकर साहका अनुसार ल्याबको लागि सेफ्टी क्याबिनेट आइसकेको छ । त्यसैले अब एक, दुई दिनभित्रै ल्याब स्थापना भएर स्वाब यही परीक्षण हुनेछ ।
भेन्टिलेटरसहित २० वेडको कोरोनाको लागि आइसियु तयार गरिने
वीपी प्रतिष्ठानमा संघीय सरकारको सहयोगमा भेन्टिलेटरसहितको २० बेडको आइसियु तयार गरिने भएको छ । कोरोना जोखिम सामना गर्नको लागि पुर्वतयारी स्वरुप वीपी प्रतिष्ठानमा यस्तो तयारी भइरहेको छ ।
कोरोना लक्षित आइसियु कम्तीमा २ साताभित्र तयार गरिने प्रतिष्ठानका अस्पताल निर्देशक डा.साहले बताए । उनका अनुसार अहिले कोरोनाको लागि पेइङ वार्डमा १० बेडको आइसोलेसन तयारी अवस्थामा छ । आवश्यक पर्दा ३० बेड पनि तयारी छ । त्यहाँ भेन्टिलेटरसहित २ वटा आइसियु बेड पनि तयार गरिने उनले बताए ।
_1711524552_1711967437.jpg)
